لولا دمك

لوما دمك لو ما ثارك
لو ما شبينه على افكارك
جا صافحنه جفوف الظالم
ما قرينه بفتوة عالم
لا صرنه جنودك وانصارك

==
لو ما كمر هاشم ضوه ما جا ضوت دنيانه
ولو ماعلي الاكبر فعل ما هابته عدوانه
ولو نحر عبد الله اشتكه ما جا نزف شريانه
ولو حنة القاسم جذب ليش السما فرحانه
ولو ما دمك يابو اليمه
ما جا نهضت هاي الامه
لو ما من عزمك واصرارك
ما صرنه جنودك وانصارك

==
لو ما قرينه بمنهجك صوت المنابر ثوره
ما جا قره العالم درس هالغصن من يا شجره
بيت الرساله منبعك وامك البضعه الحره
والدك حماي الحمه ولايذ الكون بكتره
لوما جدك هوه القائد
سلم راية حق للوالد
وانت اليوم الطف اختارك
ما صرنه جنودك وانصارك

==
لو ما رضعنا باللبن حبك وعايش بينه
لو ما وعينه برايتك وبدربك اتربينه
ولو ما عدالة نهضتك وبحكمتك تهدينه
ما جا تجرعنه الصبر لاجلك ولا ضحينه
لو ما حارس امة جدك
مذبوح وحامينه بسدك
وبحضنك جامع زوارك
ما صرنه جنودك وانصارك

==
منك تعلمنه الدرس عز وفخر ومروه
ومن زينب بطف كربلا درس الصبر والتقوى
ومن الكمر درس الوفه ومثله اليوافي الخوه
وانصارك انطونه درس بالمرجله والنخوه
والحر لو ما شافك فارس
ما يوكف لخيالك حارس
لوما فك عينه على انوارك
ما صرنه جنودك وانصارك

==
ثورتك مو دمعة جفن لابس مواكب كل عام
ثورتك قاموس وفكر تتباهه بيهه الايام
نحر الذبح سيف الظلم تاريخ سجل وارقام
ظل شاخص بوجه الزمن وانمحت ذيج الظلام
ظالم ينطي الرايه الظالم
جم دوله المرت جم حاكم
لو ما وسع الدنيا اخبارك
ما صرنه جنودك وانصارك